«Рэжым даўно зрабіўся сэрыйным забойцам, і кожнае новае забойства пазнаецца па почырку»

20 лютага стала вядома пра смерць у зняволенні вязня сумлення Ігара Ледніка. Яму прысудзілі тры гады калоніі за артыкул у часопісе. Ігар Леднік меў інваліднасць. Гэта пятая смерць палітзняволенага ў Беларусі.

Літаратар Андрэй Хадановіч:

— Рэжым даўно зрабіўся сэрыйным забойцам, і кожнае новае забойства пазнаецца па почырку…

Ігар Леднік, палітвязень, асуджаны па КК 347, на тры гады, з інваліднасьцю, меў 63 гады, не перажыў адсутнасьці сваечасовай мэдычнай дапамогі.  

Сьветлая памяць...

Праваабаронца Андрэй Стрыжак:

— Ігар трапіў у турму за тое, што хацеў лепшага жыцця для сваёй краіны. Ігар быў прынцыповым і паслядоўным у сваіх поглядах.

Не заўсёды я пагаджаўся з тым, што ён кажа, але Ігар ставіў пытанні, на якія нам усім шукаць адказаў — якой будзе нашая будучыня. У якой шмат што будзе, але дакладна ня будзе Ігара.

Журналістка Любоў Лунёва

— Ігар Леднік… Мы павінны перажыць і гэта, але як з гэтым жыць. Людзі так пакутуюць, што паміраюць. І як гэта спыніць?..

Ніхто нам не дапаможа пакуль не скончыцца праклятая вайна. А яна усё ніяк не скончыцца…

Актрыса Света Бень:

— Вечная памяць і спачуванні родным. Страшна ўсведамляць, што нас ужо даўно не здзіўляе адсутнасць масавай увагі да непрымальных умоў і катаванняў у беларускіх турмах.

Здзіўляе толькі гэтая бязмежная ненажэрнасць зла і тое, колькі болю можа вытрымаць чалавек.