«І хай «Филин» не толькі зробіць вас мудрэйшымі, але ператворыцца для вас у птушку шчасця і ўдачы»
Эксперты падзяліліся наказамі для чытачоў на 2022 год.
Напярэдадні Новага года Филин спытаў у людзей, з меркаваннямі якіх мы знаёмілі вас на працягу года, які б наказ і якія пажаданні яны б пакінулі чытачам на 2022 год. Вось што з гэтага атрымалася.
Юрый Дракахруст: «Пугачы — яны такія, здольныя тварыць добрыя цуды»
— Як казаў Гегель, сава Мінерва — птушка мудрасці — вылятае ў прыцемках. Прыцемкаў зараз у нас хапае. Але самыя цёмныя прыцемкі — перад світанкамі.
І хай «Филин» не толькі зробіць вас мудрэйшымі, але ператворыцца для вас у птушку шчасця і ўдачы. Пугачы — яны такія, здольныя тварыць добрыя цуды.
Юрый Чавусаў: «Гэта павінен быць год ведаў»
— 2021 год быў надзвычай цяжкі для ўсяго свету праз наступствы пандэміі, і звязанымі з імі шматлікімі крызісамі і выклікамі.
Для Беларусі гэтыя цяжкасці былі, мабыць, памножаныя на эфекты палітычнага крызісу, якія балюча ўдарылі па грамадзянскай супольнасці. Наступствы гэтых падзеяў будуць далёкасяжныя, і яны без сумневу будуць вызначаць аблічча надыходячага года ў Беларусі і свеце.
Аднак, апроч новых выклікаў, адыходзячы год прынёс нам адну вельмі карысную рэч — гэта досвед, а досвед азначае веды, навыкі, здольнасць пераадольваць цяжкасці на грунце ранейшага вопыту.
Ілюстрацыя па просьбе суразмоўцы
І веды маюць вельмі важную ўласцівасць: у чалавека можна адабраць шмат чаго: працу, волю, родны дом, нават радзіму. Але веды — іх адабраць нельга!
І калі чалавек шануе веды, назапашвае іх, карыстаецца імі, развіваецца, прагне развіцця — ён мае шанец вярнуць сабе ўсё, што было адабранае.
Таму ў 2022 годзе нам усім, чалавецтву, беларускаму грамадству, наканавана рабіць гэты год — годам ведаў, пазнання, рацыянальнага дзеяння. Насуперак эмоцыям. Гэта павінен быць год ведаў — інакш ён стане страчаным годам роспачы і працягу канфліктаў.
Александр Фрыдман: «Кожны дзень, тыдзень, месяц і год набліжае Беларусь да дэмакратычнай будучыні»
— Для тых, хто хоча бачыць Беларусь вольнай і дэмакратычнай краінай, 2021-ы год атрымаўся вельмі цяжкім, багатым на негатыўныя эмоцыі, расчараванні і нават адчай. Менавіта пасля такога года, калі падаецца, што зло канчаткова перамагло дабро, а запаветных пераўтварэнняў і чакаць ужо не варта, нельга страчваць надзею.
Асаблівасць дыктатарскіх рэжымаў – жыццё без будучыні. У іх ёсць мінулае, ёсць сённяшні дзень, але ў іх няма будучыні. Найноўшая гісторыя паказвае, што яны знікаюць. Некаторыя раней, іншыя – троху пазней.
А гэта значыць, што кожны дзень, тыдзень, месяц і год – нават такі, як 2021 – набліжае Беларусь да дэмакратычнай будучыні.
Хочацца спадзявацца, што чакаць засталося ўжо не так доўга. Можа, яна прыйдзе ўжо нават у 2022 годзе.
Павел Усаў: «Гэта наш гістарычны шлях і мы павінны прайсці яго да канца»
— Перш за ўсё, хацелася б падзякаваць за вытрымку і сілу духа. Мы ўсе будаўнікі нашай нацыі, як бы цяжка ні было, але гэтае полымя загортвае і ўзмацняе фундамент будучага дэмакратычнага грамадства.
Можна расчароўвацца ў палітыцы і палітыках, але гэта наш гістарычны шлях і мы павінны прайсці яго да канца.
Наста Лойка: «Заставацца сабой і памятаць на свае правы»
— У 2022 годзе варта навучыцца лёгка ўспрымаць усё, што будзе адбывацца.
Упэўненая, нас чакаюць працяг рэпрэсіўных практык і новыя выклікі, але ўсё роўна варта заставацца сабой і памятаць на свае правы.
Вадзім Мажэйка: «Прымаць рашэнні па сумленні»
— Год контррэвалюцыі — гэта было няпроста для ўсяго грамадства. Жадаю ўсім нам у 2022 годзе прымаць рашэнні па сумленні, не паддавацца страхам, верыць у сябе і ў Беларусь, шанаваць сяброў, калег і блізкіх.
Анатоль Котаў: «Трымаемся!»
— Жадаю, каб 2022 год для ўсіх стаў годам перамогі, вызвалення і адраджэння сапраўднай беларускай дзяржавы. Мужнасці нам усім, здароўя і поспехаў! Трымаемся!
Оцените статью
1 2 3 4 5Читайте еще
Избранное